Sopelanak itsaslabar arranditsuak eta malkartsuak eta hondartza zoragarriak ditu. Gainera, herriak, aisialdia eta kirola, biak tartekatu nahi dituena gozaraziko du, surf, bodyboard, parapente, eskalada eta mountain-bike irteerak egiteko leku ezin aproposagoa baita.
Lau hondartza oso erakargarriak ditu. Barinatxekoa surflarien bilgunea da. Mutur batean, nudismoa egin daiteke, eta nazioarteko nudista lasterketa ospatzen da urtero. Arrietarakoan biltzen da jende gehiena, eta Atxabiribilekoa, itsaslabarrez inguraturik, itsasora irekitzen da. Beharbada Meñakoz hondartza nudista da helezinena eta bakartiena.
Lau hondartza horiez gainera, Getxotik Sopelara itsaslabar ikusgarrien artean hedatzen den ibilbidea zeharkatzea ere merezi du. Parapentea eta delta-hegala egiten dira hemen. Bidean Aixerrota errota eta Punta Galeako itsasargia aurkituko ditugu. Gainera, ugariak dira gune berdeak, esaterako, Iturrieta parkea eta bertan dagoen Balearen urmael ezaguna.
Ikustekoak dira ere San Pedro (XVI. mendea) elizan topatutako aztarnategiak eta dorre barroko bereizgarria; San Andres ermita erromanikoa eta bere itsas xehetasunak; inguruko baserriak eta kaleak apaintzen dituzten estilo ezberdineko eskulturak. Herritik gertu aurkitutako historiaurreko kokalekuak ere aipagarriak dira, adibidez, Kurtzio, Bizkaiko zaharrenetakoa.
San Pedro jaiak ekainean dira, Karmenak uztailean eta San Andres jaiak azaroan. Erdi Aroko azoka abuztuan ospatzen da, antzerkia, kalejira, akrobaziak, eskulangileak edota salgai-dendak ikusi eta denboran atzera egiteko aukera da erdi aroan bezala jantzita.