Arabako hiriburuko jatetxeen artean ospetsuenetarikoa da, baita zaharrenetakoa ere. Hiriko hirigune historikoan dago, XV. eta XVI. mendeen artean eraikitako etxean. Xehetasun errenazentistak, gotikoak eta mudejarrak ditu. Bere garaian, merkatarien ostatu izan zen.
Sei jangela ditu, horietako lau pribatuak. El Portalón jatetxean, sukaldaritza tradizional onena dastatzeko aukera izango dugu, baita lehen mailako osagaiekin egindako plater gustagarriak ere. Horien artean, babak, barraskiloak eta Araban hain tipikoak diren perretxiko edo onddoak dira nabarmenenak. Horrez gain, bere instalazioen artean, jatetxeak upeltegia ere badu. Errioxako ardoak gordetzen dira, eta ahal denean, jatetxera hurbiltzen direnek, upeltegira joan eta dastatuko duten botila aukera dezakete.