Ezkio-Itsason kokatua, Igartubeiti paregabeko baserria da Euskal Herrian, Gipuzkoa Foru Aldundiak erakustoki modura zabaldu zuena 2001eko udan. Igartubeiti XVI. eta XVII. mendeetako arkitekturaren adierazgarririk onena da, eta euskal baserriaren Urrezko Garaiaren erakusgarri zehatza.
Baserriko bisitaldian zehar altzari eta tresna ezberdinak aurkituko ditugu, gehiengoa egurrez egina, eta duten erabileraren arabera jarriak gela bakoitzean.
Egun, XVI. mendeko dolare bat osorik ikusteko aukera daukagu, eta sagardoa nola egiten zen erakusten da bertan. Gainera sagar zanpatuaren usaina, ihartzen uzten den belarraren eta larruen usaina, kearen usaina hartuko dugu baserrian; sukaldearen eta ukuiluaren argi-ilunetan barneratuko gara; egurraren karranka adituko dugu ganbaran; laburbilduz, gure arbasoen lan eta bizimodura gerturatuko gara.