Gasteizko alde zaharrean dago Kordoiren Etxea, antzinako gremio-kalerik ezagunenetariko batean, Aiztogile kalean, hain zuzen, eta 24. atarian, zehatz-mehatz. Izenak etxe sarrerako ojiba-arku handietako bat apaintzen duen kordoi frantziskotarrari zor dio.
Monumentu historiko-artistiko hau jauretxea eta merkataritza-etxea izan zen eta Gasteizko XV. mendearen lekuko bizia da. Garai hartan Gasteizek ia mila etxe inguru zituen, gehienbat merkataritzara bideratuta, hiria leku estrategikoan zegoen-eta: Gaztela barrualdearen eta Kantauriko portuen artean. Garai hartan ekonomiaren, gizartearen eta hiriaren goraldia jazo zen, tokiko merkataritza era iraunkorrean finkatu zen eta gero eta abantaila gehiago izan zituen.
Kordoiren Etxea Araba eta Gasteizko Aurrezki Kutxa, Vital Kutxakoa da orain, eta bere Gizarte Ekintzako egoitza ere bada. Aldaketa ugari izan ditu mendez mende. 1962ko zaharberritzearekin batera, barruan Erdi Aroko dorrea zegoela ikusi zen, eraikina hainbatetan estali zela-eta ordura arte ostenduta egon zen. Jatorriko eraikinetik gaur egun bakarrik dago lehen solairuaren parean dagoen ganga itxurako areto bikain bat. Kanpoan, behe-solairua ojiba-arku handi biren inguruan dago antolatuta, jarduera nagusia merkataritza zen eta bere sasoian arku horiek jauregirako sarbideak izan ziren.