Aquariuma da bisita gehien jasotzen dituen ekipamendua Gipuzkoan. Bertan hartuko ditugun ezusteko atseginen segida zoragarria da: bale baten hezurdura, mila arraitik gora dituen ozeanarioa, ukitu daitezkeen akuarioak...
Txuri eta Kontxita izen bereziak hartzen dituzten bi zezen-marrazo dira 5.000 izaki bizidun baino gehiago biltzen dituen gune honetan protagonistak. Arrain tropikalak, Kantauri itsasoko espezieak, arrain arriskutsuak edota medusak ikusiko ditugu gaikako akuario desberdinetan. Hala ere, eta Aquariuma 1998an berritu eta handiagotu zenetik, ozeanarioa da bertako ikurra, ia-ia bi milioi ur litro hartzeko ahalmena baitu. Erditik zeharkatzen duen tunel akrilikoaren bitartez, marrazoaren, arraiaren eta espezie anitzen bizimodua gertutik jarraitzeko aukera eskaintzen zaigu, ur-azpian izango bagina bezalaxe. Hamaika metrotik gorako luzera duen egiazko bale baten hezurdurak, gipuzkoar kostaldean harrapatu zen azkena, ongietorria ematen digu.